Naš Radworski chór Meja pěstuje hižo wjacore lětdźesatki swěrne partnerstwo z chórom w Bašće njedaloko Ostravy w južnej Čěskej. Tohodla běchu nas Bašćenjo na zakónčacy koncert lětušeho chóroweho festiwala přeprosyli, kotryž zarjaduja tam we wěstych wotstawkach na česć Eduarda Hakena (1910-1996), wulkeho syna wsy a wjelelětneho sławneho basista Praskeje statneje opery. Mjenje bóle připódla so w rozmołwje mjez čěskimi a serbskimi přećelemi wukopa, zo traja styki mjez ćelesomaj lětsa runje 40 lět. Tehdy běchu Bašćanam při pytanju za partnerskim chórom w zarjedźe Domowiny adresu Radworskeho chóra sposrědkowali.
Z toho nastali su wjacore fotowe albumy, kotrymž so nětko dalši kapitel přidružili. Zhromadnje z Lubinu Žurec-Pukačowej, kotraž našeho dirigenta Pětra Cyža zastupowaše, zanjesechmy sobotu na žurli kulturneho domu w Bašce sep serbskich spěwow. Na kóncu zaspěwachmy zhromadnje z chórom z Baški “Ha widźuli ptačata ćahnyć” a “Tancuj, tancuj”. Pubilkum so nam za to z dołho trajacym aplawsom dźakowaše.
Sobotu dopołdnja pak dožiwichmy wodźenje po piwarni Radegast w Frydeku Misteku. Naš wopyt wuklinči njedźelu z Božej mšu, kotryž chór Meja wobrubi.
Tute wuprawy su stajnje něšto wosebiteho. Začuwamy přeco zaso wotrobitosć a dźakownosć čěskich přećelow, kotřiž sej zwiski k serbskim přećelam přewšo waža. To pokaza so těž tutón króč, jako móžachmy pola nich w swójbach přenocować. Z tym so tež młódšim čłonam chóra poradźi dobry počah k Bašćenjam natwarić.